紅十字軍 面「聖」死火

猪拉多纳

古天奴傷埋 唔識入波　

「紅十字軍」今晚開細騷！英超領頭羊利物浦今晚喺主場鬥「聖人」修咸頓，會有多名主力缺陣，就連進攻核心菲臘比古天奴都因傷要抖番個零月，火力肯定再打折扣。至於對手修咸頓火力亦都極為疲弱，兩軍難開入球騷，1.95倍入球細值得捧場！

（now621台周六晚10:00直播）
史杜列治冇支援單拖搵食

講到利物浦陣中創造力最強、最關鍵嘅中場球員，莫過於巴西小將菲臘比古天奴啦，上場對史雲斯喺佢傷出之後，紅軍即刻變到唔識攻，即使係中場大佬謝拉特或者新星祖阿倫，亦都難以取代佢嘅位置，可以預期今場紅軍嘅組織力會大打折扣，前方亦都未必有人支援到史杜列治，要靠呢位英格蘭射手自己「單挑」洛夫雲同荷西方迪幾件高大守衞。
「聖人」修咸頓入得2粒

最慘係紅軍連側擊力強嘅格連莊臣亦要休戰幾個星期，啱啱傷好嘅「帶刀侍衞」丹尼爾艾格同高路托尼亦未知出唔出得，想靠死球取得士哥亦有難度。作客嘅修咸頓雖然擁有列基林拔呢位當紅前鋒孭飛，可惜佢喺今季英超嘅表現唔算太好，開咗咧4場只入得1粒嘅新援奧斯華度又未融入球隊，搞到全軍至今夾埋只得2球進帳，火力認真唔多掂。

雖然領隊普捷天奴信誓旦旦咁話士哥一定會陸續有嚟，不過佢哋今場對手始終係利物浦，就算傷兵滿營實力仍然喺「聖人」之上，想破入球荒，始終唔係易事，睇怕今場入波都唔會多得去邊。
Data King 修咸頓半場唔識入波

‧兩軍近5次喺晏菲路球場交手，利物浦取得4勝1負。

‧修咸頓連續5場未試過喺上半場入波。

‧利物浦射手史杜列治連續3場聯賽先開紀錄。

‧利物浦連續5場上半場領先。
乜都玩錦囊 利物浦搶攻博半場W

利物浦今季表現穩定，而且踢法主動，開季至今5仗都喺半場就領先對手。射手史杜列治上仗復出，立即將自己喺聯賽上半場入波嘅紀錄增加至4場，就連新兵域陀摩西斯都畀佢感染到，上場一正選即有士哥。對手修咸頓啱啱相反，連續5場半場食白果，就連喺聯賽盃同英冠班士利交手，半場都要落後，今仗紅軍坐鎮主場，肯定主動出擊，2倍利物浦「半場勝」咪錯過。