富咸殘陣攻守唔掂 車仔「主W」破蛋而出

猪拉多纳

今晚英超上演西倫敦打吡，車路士喺主場迎擊富咸。車仔教頭莫連奴日前歐聯再度拋出「雞蛋論」，話班波冇扭轉逆境能力，不過今場面對殘陣應戰嘅富咸，何來逆境波﹖吼實車仔1.68倍「讓球主勝」啱數。

（now621台周日凌晨0:30直播）
受傷貝碧托夫復出五五波

車路士周中喺歐聯倒灶不敵巴素利，箇中原因同莫帥喺比賽尾段一下子抽走林柏特及雲堅基爾兩名防中，換入桑馬達及丹巴巴亞搏錘，搞到防守變得薄弱有關，雖然最終博輸換嚟千夫所指，但筆者頗為欣賞莫帥呢種大膽作風。今晚返到聯賽，車路士毫無傷停問題，喺歐聯收起嘅箭頭費蘭度托利斯亦蓄勢待發，當然要怒炒富咸重振士氣。

讀者或者會問，車仔近3次主場鬥富咸和晒，睇落唔多掂喎？如果富咸今場夫添嘅話，筆者應該有所避忌，但佢哋除咗戴倫賓特、拜仁雷斯養傷，上輪鬥西布朗受傷被換走嘅貝碧托夫，消息話佢復出機會得五五波，即係落場都未必夠狀態，單靠稚嫩嘅卡沙米好難搵食。再者經驗豐富嘅後衞艾朗曉士同首席門將史基倫堡繼續抖之餘，嶄露頭角嘅馬菲比格斯日前證實都要做疝氣手術，最少抖3個禮拜，攻不銳守不穩，今場大敗難免。