西布朗 新特蘭無火 弱「細」社群鬥踢悶波

猪拉多纳

英超賽事嚟到第5周，20支球隊當中，依家只係淨番2隊未開齋，佢哋分別係尾二嘅西布朗同包緊艇嘅新特蘭。今晚呢兩班波會進行榜末大戰，名副其實海軍鬥水兵，小妹覺得佢哋想入波都係有心無力，一於捧1.72倍入球細啦！

主隊西布朗喺對上兩季都排喺前10，可惜今季已經打回原形，最恐怖係佢哋開季至今4戰只得2和2負，夾埋先入得嗰1粒咁大把，都咪話唔得人驚。

其實早喺首兩輪比賽嘅時候，西布朗鋒力極度疲弱嘅問題已經人所共知，不過領隊仲未肯對症下藥，季前明明放走咗咁多件主力、唔肯買番啲有質素嘅球員都算喇，最天真係用高峰期已過嘅安歷卡去頂替盧卡古，要知道呢位法國前鋒根本係搵緊退休金養老，佢嘅進攻拍檔史葛冼佳亞、沙恩朗又擺明係水貨，呢個弱雞三叉戟空有名氣，西布朗想入波都難啦！
「黑貓」4件前鋒冇個掂

另邊廂，上季由主帥迪肯尼奧帶領、驚險護級成功嘅新特蘭，都係衰埋一堆，4戰只得1和3負。季前佢哋為咗解決球隊對史提芬費查過分依賴嘅問題，掟咗880萬鎊羅致美國國腳艾迪杜里，但可惜踢落先發現佢根本冇貨交，早前作客對水晶宮嗰場波，「黑貓」仲夠膽死衰到零射門中框，今晚望佢哋突然翻生有士哥？好難囉！

講到底，西布朗同「黑貓」之所以搞成咁，鋒力弱過藥煲先係主因，佢哋一日唔買啲好前鋒，小妹都覺得呢兩隊波捧唔過，之後係點都好，既然兩軍難得對戰，唔買入球細都對唔住自己啦，不過提一提大家，睇波前記得沖定杯咖啡提神，小心悶到瞓着呀！