國米劏魚腩薩斯索羅

猪拉多纳

意甲早場薩斯索羅主場對國際米蘭，薩斯索羅升班後全敗，踢落完全唔夠班，今晚人腳又唔齊，根本頂唔住大勇嘅國際米蘭，1.82倍客勝值得捧場。

（周日晚6時30分開賽）

薩斯索羅今季升班一開局就顯示準備不足，頭3仗面對實力平平嘅拖連奴、利禾奴同維羅納不但全敗，而且每仗起碼都要淨輸兩粒，尤其上仗作客吞維羅納兩蛋，全場畀人撳住打，現階段戰鬥力實在曳得交關，今仗佢哋三線主力守將泰拿洛華、中場盧卡馬朗尼同射手杜文尼高貝拉迪分別傷停，戰鬥力進一步削弱。

國米同羅馬一樣，今季喺新帥馬沙利手上表現比預期更好，佢排嘅「3511」陣式絕對適合目前球員特性，開咧頭兩場先後輕取熱拿亞同卡坦尼亞兼未失一球，上仗主場面對班霸祖雲達斯賽和1比1，但場上形勢不落下風，今晚夠晒級數同狀態劏魚腩。