藍月亮齊架生 斬殺無火紅魔

猪拉多纳

「打吡王」比歷連尼未驚過

今季英超另一高潮殺到，水火不容嘅「曼市雙雄」今晚喺曼城球場交鋒，亦係兩位新帥比歷連尼同莫耶斯嘅考牌戰。主隊曼城上周中歐聯強勢反彈，隊長高柏尼復出令後防穩陣晒，今場更有大衞施華傷愈候命，「打吡王」比歷連尼齊晒「架生」，有力砌低今季一撞強隊就冇符嘅曼聯，讓平半捧上盤。

（now621台周日晚11:00直播）

之所以話比歷連尼係「打吡王」，皆因呢位60歲智利籍教頭參與過「南美超級經典打吡」同「西班牙打吡」，賽前佢話昔日執教河床嗰陣，如果唔好彩輸畀小保加，就要匿喺屋企成個禮拜避風頭，所以「曼市打吡」對佢嚟講只係碎料喎！查實比帥咁牙擦又唔係冇原因嘅，事關上場英超失分畀史篤城後，養傷多時嘅隊長高柏尼已經喺上周中歐聯復出，隊波亦以3球大炒柏辛域陀尼亞敲響分組賽勝鼓，士氣好到不得了。
曼城高柏尼 大衞施華復出

據《曼徹斯特晚報》講，因大腿傷缺陣兩仗嘅大衞施華可以復出，操練嗰時畀波省中鼠蹊嘅耶耶托尼亦冇大礙，相信比歷連尼喺呢場史上第166次「曼市打吡」呢啲大戰，唔會再敢走去試尼格度搭祖維迪嘅新組合，會搵番阿古路拍迪斯高擔正，再由「Yaya」、施華同捷西斯拿華斯從後支援，中前場火力夠晒猛。

死對頭曼聯自莫耶斯接掌後，又真係冇咗昔日嗰份霸氣，畢竟莫帥以往教愛華頓都係玩開穩守突擊，霎時間叫佢去沿襲紅魔嘅控球在腳兼主攻戰術，難免要時間適應。事實上，曼聯今季英超控球率只係54.7%，足足輸曼城（62.4%）成條街，冇錯朗尼同尹佩斯呢對箭頭係Fit，但新季撞正車路士同利物浦兩支勁旅都冇晒符，表現冇乜說服力啫！
曼聯控球率輸成條街

再講吖，唔知莫耶斯係咪唔太敢玩輪換，如果今仗佢真係搵里奧費迪南夥拍尼曼查維迪擔正，就係繼2010年之後，兩位中堅首次喺一星期內連續3場波齊齊擔正，呢兩位仁兄加埋成66歲仲扯到咁盡，絕對係曼聯後防嘅隱憂。
Data King 曼城半場4連和

‧曼城連開4口半場和。

‧雙方近4仗都開半場細。

‧對上52場英超主場賽事曼城都有波入。
乜都玩錦囊 紅魔遇強死火捧細

自從上季英超開咧至今，曼城足足有21仗保持清白之身，次數冠絕英超。睇埋曼聯今季戰績，對住車路士同利物浦兩支實力分子都食白果，考慮到紅魔新季英超亦只失過2球，預期呢場「曼市打吡」唔會多波入，1.85倍細好路。