切爾達 維拉利爾「大」打出手

猪拉多纳

今晚西甲有場切爾達主場鬥維拉利爾嘅戲碼，切爾達開季3場不敗後，上星期作客畢爾包終被打破不敗身，雖然初嘗敗績，但呢班波踢法進取備受好評，今晚撞正攻強守弱嘅維拉利爾，預期入波唔會少，1.78倍「入球大」值得一試。

（開賽時間：周日晚11:00）
切爾達森巴三俠有料到

切爾達今季由名將安歷基執教，一改以往保守風格，巴西籍前鋒查里斯直接受惠，4場入咗3球交足功課，配合同鄉嘅拉芬拿艾簡達拿同前線拍檔洛尼圖，呢個「森巴鐵三角」火力超勁，入球應該會陸續有來。當然，有得必有失，既然轉風格就一定要承受風險，佢哋條防線4場失咗7球，今晚對住着晒火嘅維拉利爾，想唔失波怕且都好難咯。

維拉利爾今季重返西甲，開季隨即帶來驚喜，4戰得10分，力壓皇馬坐緊3哥位。最重要係呢班波啲中前場球員個個都咁弗，攻擊點眾多，已經有6個球員開咗齋，當中杜斯山度士、卡尼同查維亞阿基路都係能傳善射之輩，今晚對住防守唔算穩健嘅切爾達，又係爭取士哥嘅良機，「入球大」唔好走寶呀！