巴塞-2盡情爆蘇

猪拉多纳

改打快速反擊火力倍增

西甲周中加開快車，巴塞隆拿率先登場，主場對皇家蘇斯達。巴塞今季由新帥馬天奴執教後，逐漸放棄過往Tiki Taka控球在腳踢法，大踢快速反擊，侵略性更勝從前，已連續兩仗贏4球，證明「馬天奴革命」成功，變身「特快坦克」，對手更難抵擋。皇家蘇斯達上季製造嘅驚喜，只屬曇花一現，兼顧歐聯戰線之下，戰鬥力已被拖垮，更何況近5次訪魯營，3次失5球，恐怕難逃被大炒，巴塞讓兩球，照捧「讓球主勝」。

（now 632周三凌晨2時直播）

巴塞傳統控傳踢法，的確好悅目，並帶來佳績，但一本天書，唔可以睇到老，Tiki Taka戰術已被列強洞悉破解。馬天奴採用嘅緊迫攔截、快速反擊，正好彌補球隊過往不足之處。事實上，美斯、柏度洛迪古斯、尼馬皆為高速球員，呢套戰術好適合佢哋發揮，柏度洛迪古斯上仗更大演帽子戲法。巴塞現時控球時間，可能減少咗，但其實攻勢更入肉，更具效率，入球數字仍然高企，繼歐聯贏阿積士4比0後，上仗又贈華歷簡奴4蛋，要炒蘇斯達3球或以上，並唔困難。

皇家蘇斯達上季打入前四，表現一鳴驚人，但同好多「神奇球隊」一樣，往往都係曇花一現。蘇斯達今季演出明顯跌晒Watt，一來主將伊拿拉文迪轉投皇馬，令中場實力打折扣，二來分身歐聯，兵源有限之下，無力兼顧兩條戰線。蘇斯達季初仲係威係勢，但歷經外圍賽激鬥里昂後，開始無以為繼，近三仗更加冇波入，球員似乎已經踢到腳仔軟。
蘇斯達訪魯營多大敗

魯營球場更加係蘇斯達嘅「大凶地」，踏入2000年後，11次作客巴塞，全敗收場，近5次有3次失5球，包括上季輸1比5，另外兩次更淨吞5蛋。以蘇斯達目前嘅疲態，隨時輸鑊甘。