今時唔同往日 吳定強又搶胡

猪拉多纳

　　賭馬同做人都係一樣，有時唔跟紅頂白唔得。入去賭場玩兩手，遇啱在座有個黑仔王買乜輸乜，咁鬼好「路」，唔通仲要同錢鬥氣，梗係佢買咩，自己買對家，有錢冇理由唔執。

　　買馬思考方式差不多，某個馬房發晒霉，好日唔贏一場，唔通我哋嫌錢腥？定係鍾意做善事？仲要擺錢落去！有理冇理揀當旺練馬師，熱冷唔拘，冇所謂，識贏就得，話之佢係華洋馬房。

　　正如吳定強，年年季初成績「旺角隔離」，偏偏今季情況改觀，嘩，一出閘快手快腳贏3W，穩定軍心兼以行動證明決心搶胡，之所以，佢以前嘅舊日形象，唔可以再攞番嚟講。

　　金津好狀態復甦

　　原本吳廐馬贏完，再出真係唔敢再掂，依家好鬥志，個倉啲馬用得就用，砂煲罌罉攞晒出嚟。第二場「金津好」，上季尾終於識上名，係年半以來首次，久沉馬搞番好，以前三班有得贏，現在四班負輕磅路短亦唔冇所謂。

　　第六場「聖驛善」，上仗成為巨人殺人，劏晒同場質新馬，一出招就贏，潛藏甚豐，留在三班負磅仍輕，冇有怕。