哨牙蘇復出咬大個騷

猪拉多纳

雙紅會例牌飛沙劈石

蘇亞雷斯坐完波監＝入球騷！英聯盃第3圈超強戲碼，曼聯主場對利物浦，紅魔鬼新帥莫耶斯上任後劣績斑斑再輸唔掂，必盡派主力落場；紅軍新敗後有「哨牙蘇」強戰奧脫福，當然想「咬」多死敵兩啖，一對世仇肯定全場喪攻，吼大盤！

（廣東體育周四凌晨2時45分直播，馬會文字直播）

兩軍次次對碰，無論當時兩軍狀態、實力、排名如何，每次呢個Match up出現都精彩可期，落場球員個個都付出120%努力，飛沙劈石拚個你死我活。曼聯今季改朝換代，莫耶斯承接費格遜衣缽統領紅魔鬼，個頭開得勁曳，目前英超5戰僅取7分排第8，最大鑊係先後不敵利物浦、曼城，主場對車路士亦贏唔到，盡失王者風範。
尹佩斯未傷愈續缺陣

目前當地莊家已大大調低莫耶斯被炒賠率，呢位蘇格蘭教頭壓力愈來愈大；「曼市打吡」大敗之後，如果今場未能擊敗紅軍，後果不堪設想，故莫帥肯定當今場係決賽嚟砌，雖然尹佩斯未好番，但相信朗尼、費蘭尼等大將會落場搏殺，香川真司、查維亞靴南迪斯等亦有機會「解凍」披甲，只要莫帥加強球隊創造力，曼聯喺主場要攻破紅軍防線並唔困難。

利物浦開咧3場都贏1比0得保清白之身，但之後格連莊臣缺陣、丹尼爾艾格及荷西安歷基有傷在身，防線唔單止唔穩，仲非常危危乎，上仗主場對修咸頓若非門將米洛列特頻頻神救，紅軍絕對唔止輸0比1。面對「聖人」尚且咁狼狽，又點頂得住托弗嘅朗尼呢？
阿蘇踢國際賽托弗

紅軍整體狀態無疑有所回落，但今仗有蘇亞雷斯停賽完畢復出，領隊羅渣士上仗賽後話，如果有「哨牙蘇」就唔會輸波，明顯當佢係救命草。雖然阿蘇坐咗10場波監，但佢喺國際賽表現Sharp醒，代表烏拉圭熱身賽對日本有士哥、世盃外鬥秘魯更省2粒，今次再遇仇家艾拉，蘇亞雷斯必施渾身解數。9月頭「雙紅會」，利物浦主場僅勝1比0，但踢英超同盃賽，無論踢法、心態都截然不同，今場捧大盤啱數！賽制方面，法定時間打和將加時30分鐘，再和互射12碼分勝負。

猪拉多纳