拜仁-2照攞威

猪拉多纳

哥帥唔再執着 任戰將發揮

今晚德國盃第2圈直播戲碼拜仁慕尼黑主場迎戰漢諾威，兩軍都處於德甲前四位置，但呢場波根本強弱懸殊冇得打，尤其漢諾威教頭史隆卡對德國盃從來唔重視，而且佢哋作客強隊都照攻，唔介意輸多幾球，拜仁大勝可期，「讓球主客和」讓兩球都唔係問題，照捧1.72倍「讓球主勝」。

（無綫翡翠台周四凌晨2時30分直播）

拜仁近期三線作戰係幾忙，但基於上季軒歷基斯創造出完美成績，新帥哥迪奧拿肩負沉重壓力，對任何賽事都冇得放鬆。兩軍兩周前喺聯賽交手，當時拜仁主場只贏2比0，但當時拜仁仍然適應緊哥帥嘅新踢法，好彩近期佢都唔再死牛一面頸，開始給予球員更大自由度，演出亦一仗比一仗好，上周中歐聯對莫斯科中央陸軍及周末對史浩克04都踢出霸氣，就算今晚派出雲拜頓、湯馬士梅拿、比沙路等二線兵夠殺有餘。
漢諾威正宗門口狗

漢諾威近年喺微笑教練史隆卡手上取得令人意外嘅好成績，目前更位列德甲第4位，不過佢哋一向攻強守弱、主強客弱，今季聯賽兩場作客輸晒冇波入兼淨失5球，何況佢哋向來唔重視德國盃，上屆第三圈畀多蒙特狂數5比1，前屆第二圈主場輸畀緬恩斯！拜仁主場近7次對漢諾威贏晒，當中仲包括5比1、7比0同5比0呢啲瘋狂戰果，漢諾威今晚再訪安聯球場又邊有運行？