紅軍咬人犯出冊降魔

猪拉多纳

「魔王」唔易做！由費爵爺手中接過曼聯帥印嘅莫耶斯，開季以嚟喺英超3鬥勁旅竟然1場都贏唔到，領軍能力備受質疑，排陣都開始進退失據，今晚「紅魔鬼」喺英聯盃第3圈，硬撼有「咬人犯」蘇亞雷斯復出嘅利物浦，名副其實怕佢有「牙」，曼聯咁都仲要讓波，力奇寧捧1.7倍「讓客」好過！

（廣東體育周四凌晨2:45直播）

「紅魔鬼」今季遇強不勝，先係賽和車路士，然後又輸畀利物浦同曼城，其中上周日輸畀同市宿敵1:4，就更加凸顯莫耶斯嘅問題。呢位蘇格蘭籍主帥根本帶唔掂大球會，處理危機經驗不足、應變能力低、唔識用人，點靠得住呀大佬？賽後莫帥話自己已經省到班人立立令，仲拍心口話信得過班手足會喺低潮成功反彈添，不過家陣曼聯嘅最大問題，其實就係佢自己，一眾紅魔好似冇晒費格遜年代嘅鬥心，一遇強就放棄，今晚憑乜去贏波先？
曼聯防線老餅 尹佩斯又傷

睇埋佢哋個陣容，條防線真係見到啲名都驚！財雄勢大嘅曼聯，唔知點解一直唔肯買後衞，來來去去都係用死幾件老將鎮守後防，上仗已經明顯跟唔到曼城節奏任人砌，好，就當佢哋今仗肯換吓人，頂上嘅無論基斯史摩寧同菲爾鍾斯一樣孭唔到飛，都係死局。前線最有把握嘅尹佩斯，因為鼠蹊傷已經冇鬥曼城，尋晚莫帥都話佢冇可能復出添。再講，莫耶斯又蛇咬都唔肯用有創造力嘅香川真司同贊奴薩，搞到尋日傳出祖雲達斯都想撬走「o靚仔薩」，想班波回復頂級勁旅本色？或者真係要等莫帥畀人炒先得咯。
利物浦聯賽盃例出夫添

利物浦呢邊，上周末聯賽不敵修咸頓被破不敗身，仲讓埋個榜首位置畀阿仙奴，表面係會打擊士氣，但力奇認為班波喺適當時候輸番場，減輕吓壓力，可能係一件好事都未定。冇錯，冇咗肩傷嘅菲臘比古天奴係會影響進攻組織力，但今仗佢哋有「牙王」蘇亞雷斯坐完10場波監復出，戰鬥力即時倍升，有佢猛虎出柙，拍住弗爆嘅史杜列治合組「2S」鋒線，要射爆曼聯絕對唔難囉！

最重要一點，係紅軍唔似得曼聯咁要分心歐洲賽事，家陣利物浦只得3條戰線，對聯賽盃肯定會格外上心，睇番佢哋上圈對住英甲諾士郡，都肯排個最強陣容出嚟，今晚硬砌宿敵「紅魔鬼」，仲唔加多兩錢肉緊咩？
Data King 利物浦英聯盃專家

‧曼聯近5次喺奧脫福鬥利物浦4次開入球大。

‧兩軍近5次交手3次開波膽2:1，1次開1:2。

‧紅軍曾8奪聯賽盃冠軍，次數係曼聯嘅2倍。
乜都玩錦囊 博埋利記半場客W

曼聯今季表現飄忽，遇上實力有番咁上下嘅紅軍真係咪寄望太多，除咗話「讓客」抵博，扒冷仲可諗埋瓣3.6倍半場客勝。睇番數據，利物浦開季以嚟6戰有5仗都可以半場領先，慣咗一開波就搏命，當然追得過啦！