熱刺車仔細不兩立

猪拉多纳

保亞斯無義 莫連奴無情

今晚英超早場上演倫敦打吡，熱刺主場硬撼車路士，矚目之處係兩位葡萄牙籍名帥保亞斯同莫連奴首次喺英超上演嘅師徒對決。賽前保亞斯自爆二人關係惡劣，甚至連師徒情誼都否定埋，而行功利主義出晒名嘅莫連奴當然亦絕唔會對呢位當年下屬留情，二人為咗爭勝，甚麼義氣舊情都唔使顧。講番場波，熱刺開季9戰僅失1球，今戰將繼續穩中求勝。而車仔前鋒表現不濟，客場惡鬥同市強敵唔會逞強，兩軍寸土必爭，預期士哥唔多，推介1.75倍細盤！

（now 621周六晚7時45分直播）
防守穩 開季9戰失1球

熱刺今夏雖失去王牌球星加里夫巴利，但資金充裕嘅主帥保亞斯則瘋狂增兵補番數，上月喺打吡戰作客阿仙奴安排大批新將打正選，結果吃盡苦頭慘敗。保帥知道自己換血換得太急，近期用番迪比利及基菲爾施古臣等舊將，前線靠蘇爾達杜攻堅，派牌工作就交畀火速融合球隊嘅基斯甸艾歷臣，中前場運作總算Run順晒。

熱刺防線變動好細，新季守得好穩陣，聯賽連盃賽9戰淨係對阿仙奴失過1球咁大把，當然，對手實力唔算好強，但依家車仔攻力都唔算勁，作客要攻破熱刺防線唔係咁易。
3大射手 聯賽仲未開齋

車路士現時最大嘅問題係欠缺一名可靠射手，3大前鋒伊度奧、丹巴巴亞同費蘭度托利斯踢咗咁多輪，喺聯賽竟然全部未開齋，呢點教頭莫連奴好清楚，所以佢夠膽死喺8月尾對曼聯場大戰擺出騎呢無鋒陣，但效果都係麻麻。家陣車仔中前場只得奧斯卡杜斯山度士狀態較佳，天才球星夏薩特則表現沉寂，長坐冷板嘅桑馬達更加雪到硬晒，創造力明顯不足。由於下輪歐聯係關鍵一戰，莫帥權衡輕重後，今戰隨時行1分政策，相信唔會立亂谷前搶攻。

保亞斯上季率領熱刺兩鬥舊主車路士同樣大手交易，主場輸2比4，作客和2比2，不過，熱刺今季踢法變得勁穩，聯賽5戰全開細，再加上車仔現時火力銳減，睇怕今仗唔會好似上季咁多波入，入球細值得一試。