馬體會反轉巴拿貝

猪拉多纳

施蒙尼教父出招瘋搶皇馬

今晚西甲爆發矚目首都打吡，皇馬坐鎮主場迎戰馬體會。上仗皇馬受「御哨」幫拖先贏艾爾切，認真醜死怪，雖有飛翼加里夫巴利復出，但遇上由「教父」施蒙尼調教下變身黑手黨嘅馬體會，其兇悍踢法實搞到皇馬眾星方寸大亂，斯維強捧「讓球客勝」。

（now 632周日凌晨4時直播）

皇馬上仗作客弱旅艾爾切，補時6分鐘靠一個極具爭議嘅12碼先擸晒三分，球證梅尼斯幫到出晒面，引起軒然大波，《阿斯報》透露呢位皇馬「御哨」可能會被罰停賽6場，甚至遭長期封殺添！儘管天價球星加里夫巴利傷愈可趕及今仗復出，與C朗合演雙翼齊飛，不過皇馬面對密集防守向來冇乜辦法，經常老鼠拉龜冇碇埋手，令兩人嘅速度優勢無從發揮。
打仔上身 中場住搶

近期蠟晒頭加套黑西裝成個教父look嘅馬體會教頭施蒙尼，名副其實係球隊教父，佢將自己球員時代嘅兇悍狠辣球風，完全灌輸落「床單 兵團」，齋睇中場如馬里奧蘇亞雷斯、佐治高基、魯爾加西亞、基比、古拿禾古等，清一色打仔格，頭六輪聯賽便造出約150次搶截，高踞西甲第一，犯規當食生菜，兇神惡煞成班「黑手黨」咁款。就算技術冇得彈嘅巴塞，季初西超盃亦受困於馬體會嘅瘋搶打法，兩回合都贏唔到佢哋，只憑作客入球封王，加上馬體會上屆西盃決賽擊敗皇馬，一洗近年對親同市死敵必腳軟嘅頹風，信心爆棚之下，今仗實剷到班皇馬球星飛起，馬體會受讓之下「讓球客勝」咪錯過。