倫敦打呲 熱刺拆「車」

猪拉多纳

師徒決裂！保亞斯青出於「藍」

上星期有「曼市打吡」，今晚就輪到「倫敦打吡」，熱刺喺主場迎戰車路士，莫連奴同保亞斯第一次喺英超正面交鋒，賽前保亞斯公開話同莫連奴「師徒情斷」，仲踢爆「寸王」當年阻礙佢發展，所以成4年都冇傾過一句偈喎！熱刺家陣氣勢如虹，今晚仲要有主場之利，使乜驚車仔先？
冇得接費Sir班寸王呆喊

西班牙記者托利斯喺新書爆料，話莫連奴知道費格遜欽點莫耶斯接班而唔係佢之後，竟然覺得被「背叛」喊咗出嚟，成晚眼甘甘望住個手機！但係佢個顧問Parames即刻走出嚟否認：「呢個古仔完全係老作，冇頭冇尾。」

莫連奴近排收晒火，唔再好似以前咁寸寸貢，除咗關費Sir事，另一個原因當然係佢隊「藍戰士」戰績一般，近5戰只得2勝1和2負，唔輪到佢牙擦擦囉！雖然「王子」費蘭度托利斯回勇，但莫帥似乎鍾意用伊度奧多過用佢，今晚有冇正選都好難講，桑馬達同大衞雷斯又無啦啦被打入冷宮，拉美利斯同雲堅基爾仲打埋柴添，當中雲堅基爾仲慘到因十字韌帶重創提早收咧，車仔陣營立立亂，要贏波有一定難度。
熱刺弗爆勇闖5連勝

莫連奴收火，佢昔日嘅徒弟保亞斯就着晒火！今場打吡戰前保亞斯突然同莫連奴劃清界線，話佢哋其實已經4年冇講過嘢，保帥仲踢爆當年想參與多啲車路士嘅教練工作，但「寸王」就諸多阻攔，只係准佢搜集敵軍資料，咁梗係反面啦！到家陣保亞斯揚名立萬、青出於「藍」，亦唔需要再睇莫連奴面色，今場更加要喺「寸王」面前做番齣好戲。

查實熱刺近期表現相當好，近5戰有4勝1負，佢哋放走咗主力加里夫巴利去皇馬後，表現完全無走樣。小妹覺得凡事有得必有失，走咗粒星，反而令到其他球員有更多機會同空間發揮。中場荷西保連奴上場聯賽對卡迪夫城嗰陣一箭定江山，另一件新兵丹麥中場基斯甸艾歷臣又成為攻守核心，熱刺大部分球員都咁弗，今晚絕對有條件食住個勢，力爭5連勝，平手盤當然要撐熱刺啦！