國米1.92倍W趁早買

猪拉多纳

卡利亞里沉到爆兼失地利

意甲卡利亞里主場迎戰國際米蘭，卡利亞里實力本身就遜一籌，加上近期狀態一般，今仗仲要喺中立場作戰冇埋主場優勢，相信難敵弗爆嘅意甲進攻王國際米蘭，1.92倍客勝係Ali今晚出擊重心。

（周日晚９時開賽）

穩健防守同快速反擊一向係卡利亞里嘅搵食本錢，不過同大部分中游球隊一樣，佢哋弱點係兵源不足，遇上傷病問題就明顯影響到戰鬥力，卡利亞里自從聯賽開鑼戰贏阿特蘭大後，接住４場聯賽都未贏過，上仗作客利禾奴因為兩名主力前鋒賓利拿同馬高沙奧有疲態，改用域陀伊巴保同利尼姆掛帥，演出更加令人失望。雖然今晚兩位主力前鋒預期可以復出，但仍然有唔少傷兵，主力包括中場高素同艾卡度因傷缺陣，守將丹尼路艾維拿同二閘法蘭斯高比辛奴亦有傷上陣成疑，戰鬥力受損。

卡利亞里賽前仲有不利消息，由於主場伊斯球場不符合安全規格仍在改建中，今場比賽要繼續移師泰利斯迪樂高球場上演，今晚根本冇主場優勢。
馬沙利激活藍黑兵團

「藍黑兵團」國際米蘭今夏喺轉會市場唔算活躍，不過教練馬沙利交足功貨，將有限資源發揮到最大威力，令呢支傳統勁旅全面復甦，球隊目前排次席只落後羅馬兩分，入球數字仲係意甲第一，５場聯賽只失兩球亦僅次於羅馬，上輪喺聖西路球場更喺一球落後下反勝大勇嘅費倫天拿，演出大受好評，而且今仗未有新傷病報告，可以繼續強陣出擊，計質計態都夠贏卡利亞里。