祖記拖連奴追角球細

猪拉多纳

長傳小組入滲都咁有計

近年每逢「都靈打吡」，焦點都係睇祖雲達斯可以贏幾多球，不過今晚就有啲唔同，皆因都靈市「阿二」拖連奴開季5戰只係輸過1場，近況跌Watt嘅祖雲達斯讓唔讓得起拖連奴真係好難講，之但係有樣嘢可以肯定，就係雙方都係靠小組入滲同後場長傳向對手施襲，大家今季各自只係開過1次角球大，咁好路，中位數9.5球嘅角球細冇理由唔捧啫！

（開賽時間：周日晚6:30）

睇番往績，拖連奴已經有18年未贏過「斑馬兵團」，陣中左閘莫拉堤賽前就話「宿命係要嚟破」，咁大口氣皆因佢哋新季戰績理想，雖然話對上兩場主場賽事都喺領先下分別畀AC米蘭同維羅納逼和2:2，但都反映出呢班波嘅鋒力唔曳，最出位必數阿利斯奧施斯。呢位首席射手出名係「濕水欖核」唧嚟唧去，大部分攻勢都係靠佢策劃，所以拖連奴極少高Q大棍波，呢個亦係佢哋頭4輪聯賽全開角球細嘅主因。
干迪唔Like側擊 泰維斯愛上腳

同拖連奴一樣，祖雲達斯今季5戰都有4場開角球細，上仗反勝基爾禾2:1場波係就係多攻勢，足足有成18次射門，不過全場只係獲得4個角球咁大把，原因係教練干迪唔鍾意玩兩翼側擊，擺喺邊路嘅馬治斯奧鍾意內切入中路幫波，派路、保羅普巴同維達爾崇尚小組入滲，前線嘅泰維斯就鍾意上腳，中前場腳法件件都咁細膩，難怪「斑馬兵團」今季場均角球得8.4個，呢場「都靈打吡」梗係捧角球細好路啦！