尼馬餓波博巴塞好「路」

猪拉多纳

美斯打柴 「新比利」難得擔正

No Messi？No Problem！巴塞隆拿今晚喺歐聯H組造訪些路迪，雖然「地上最強」有球王美斯打柴唔踢得，不過人腳點秤都高今非昔比嘅些路迪幾班，況且尼馬加盟以嚟一直要屈就做散仔，今晚難得做番次前線「揸弗人」，肯定會將上場西甲坐足全場冷板嘅悶氣吐晒出嚟，一於捧1.84倍「讓球客勝」撐「新比利」！

（有線62及202周三凌晨2:45直播）

巴塞隊長佩奧爾同左閘佐迪艾巴養緊傷，教練馬天奴臨時提升咗兩位B隊成員包括右閘柏積同中堅沙治高美斯入伍，不過傳媒焦點始終圍繞住美斯。呢位巴塞「球王」拉傷大髀要抖2至3個禮拜，《世界體育報》即刻摷番美斯缺陣嘅數據，發現巴塞冇咗佢嘅歐聯落敗率高達5成（3勝3負），撞啱今晚對手些路迪喺上年11月嘅分組賽爆冷成功，以2:1砌低巴塞獲得16強資格，唔少人都剝定花生等睇巴塞再踩蕉皮，但亨格比利就覺得，戥巴塞擔心根本就係多餘！
坐完冷板充滿「飢渴感」

係，美斯係重要，不過巴塞攻擊點勝在夠廣，法比加斯、恩尼斯達、阿歷斯山齊士甚至右閘丹尼爾都具備數胡本錢，最重要係尼馬加盟巴塞之後轉晒型做鋪橋搭路工作，為嘅就係唔想同美斯搶風頭，適逢美斯打柴，難得獲委以重任「重操故業」做番昔日喺山度士嘅前線殺手，試問「新比利」又點可以失威？啱啱巴塞贏艾美利亞場西甲，做後備嘅尼馬做咗成場熱身，以為美斯受傷可以落場啦，點知教練馬天奴都係搵沙維入替，佢老人家話睇得出尼馬對眼有份「飢渴感」，餓波成咁今晚係時候爆發。
些路迪放3大將削實力

首輪分組賽吞AC米蘭兩蛋嘅些路迪，啱啱喺聯賽以5:2大勝基爾馬諾克，射手森馬拉斯更加係3年嚟首次上演帽子戲法，恰基爾馬諾克就得啫，對住巴塞想也文也武？慳啲啦！咪忘記些路迪季前放走咗奇雲威爾遜、雲耶馬同加利賀柏3員大將，前中後三線實力都大幅削弱，早排仲樣衰到喺蘇聯盃第3圈畀甲組仔摩頓淘汰，加上鐵閘阿當馬菲斯又話有傷唔出得，今晚又想爆冷？輸少球都偷笑啦！
巴塞半場全場6連勝

巴塞隆拿近6仗全勝兼半場領先。

雙方近6次交手有4次開大。

些路迪對上5仗法定時間內，只得1場保住清白身。
些路迪進取熱捧入球大

些路迪戰鬥力喺巴塞之下係不爭事實，但查實呢支蘇超班霸踢法幾進取，上輪歐聯鬥AC亦有唔少攻勢，入唔到波只係欠運，撞正鬧緊中堅荒嘅巴塞有機會破蛋，巴塞近6場波喪入20球亦夠晒得人驚，1.54倍入球大熱就係熱啲，勝在穩陣吖嘛！
歐聯H組