拜仁衝鋒隊反轉曼城

猪拉多纳

歐聯戰火重燃，今晚焦點當然係曼城硬撼拜仁呢場D組重頭戲啦！拜仁自8月底捧走歐超盃開始贏到入10月，班波喺哥迪奧拿帶領下已上緊軌道，加上佢專恰曼城領隊比歷連尼，雙翼列貝利同洛賓又踢到曉飛，今鋪造訪海鮮到爆嘅「藍月亮」可以秤先，作客讓平半照要上盤。

（有線64及203、中央5台周四凌晨2:45直播）

上季軒歷基斯率領拜仁成就三冠王霸業，今季哥迪奧拿接手，球迷自不然對佢有好大期望，雖然話家陣隊拜仁冇咗上季嗰份霸氣，但呢支德甲班霸起碼應贏就贏。佢哋自8月底砌低車路士勇奪歐超盃後，打落5場德甲同歐聯賽事全部贏晒，上場聯賽1:0險勝禾夫斯堡係就係贏得少啲，但比起曼城以2:3輸畀冇咗首席射手賓迪基壓陣嘅維拉，拜仁正氣得多啦！
馬里奧葛斯傷愈候命

對「狼堡」場波，哥迪奧拿喺下半場收起洛賓、舒韋恩史迪加同文迪蘇傑，賽後又話咁嘅表現絕對唔足以砌低曼城，睇得出佢老人家勁緊張今晚場歐聯大戰。陣中一對西班牙「孖寶」堤亞高艾簡達拿同查維馬天尼斯仲養緊傷，不過鋒將馬里奧葛斯上場聯賽已經可以候命，意味哥帥喺攻擊人選上又多一隻棋使。
「藍月亮」表現飄忽

最重要係哥迪奧拿一直都係比歷連尼剋星，昔日喺西甲帶領巴塞面對由比帥率領嘅維拉利爾、皇馬定抑或馬拉加都未輸過，總共錄得7勝1和嘅壓倒性戰績，擺到明食住比歷連尼喎！《曼徹斯特晚報》前日透露，曼城中場大衞施華同前鋒阿古路已經傷愈可候命，不過大衞施華傷咗兩個禮拜，能唔能夠即時幫到曼城手係一大疑問。仲有，曼城今季表現反覆，可以大勝曼聯4:1，但又輸得畀卡迪夫城同維拉，加上兩閘高拉洛夫同薩巴列達擅攻唔擅守、速度又慢，隨時畀一對衝鋒雙翼洛賓同列貝利玩殘！
Data King 曼城連開4口「單」+「大」

‧比歷連尼歷來喺西甲帶領維拉利爾、皇馬同馬拉加都未試過砌低哥迪奧拿。

‧雙方喺11/12球季分組賽交手，兩仗都係主場嗰隊贏2:0。

‧曼城已經連續4場開單同大。