祖記誓挫加拉塔沙雷

猪拉多纳

文仙尼係眼中釘

歐聯B組又有好戲上演，祖雲達斯今晚喺意甲主場對加拉塔沙雷，夠晒話題性，因為加拉塔沙雷剛啱請咗文仙尼做新教練，佢曾經係國際米蘭教頭，以往同祖記有唔少牙齒印，呢次狹路相逢隨時被玩死，吼實「讓球主勝」有着數。

（有線63周四凌晨2:45直播）

祖雲達斯喺首場分組賽作客1:1打和哥本哈根，日前喺「都靈打吡戰」以1:0砌低拖連奴就有射手泰維斯受傷，多數唔能夠搵曾經喺曼城雪藏佢嘅文仙尼報仇。

不過咁，祖記隊友應該會幫泰維斯出氣，事關喺「電話門」發生後，國米趁祖記降班喺意甲打橫行，也文也武，當時帶領國米嘅文仙尼，自然成為「老婦人」嘅眼中釘。

文仙尼份人冇料扮四條，祖記教頭干地應該會畀啲顏色佢睇，何況中鋒洛蘭迪同中場馬治斯奧最近已好番，大腦派路又復出，佢哋要喺主場贏波絕對唔難。
加拉首場分組賽大敗

另一方面，加拉塔沙雷同文仙尼簽3年約，射手杜奧巴同中場史奈達又留隊，不過文仙尼過去領軍對祖記得5勝8和6負，只係算中規中矩，要即刻帶起首場分組賽主場以1:6慘負皇馬嘅加拉塔沙雷，抿啲喎！