皇馬亂糟糟 11.5倍和博得過

猪拉多纳

數據係要嚟破嘅！今晚歐聯B組皇家馬德里迎戰哥本哈根，「銀河艦隊」啱啱喺「馬德里打吡」畀馬體會打破連續34仗主場兼14年聯賽對壘不敗紀錄外，各種內部問題亦隨之浮現，今場遇着「丹麥奇兵」哥本哈根，隨時連歐聯主場首騷35連勝紀錄都講拜拜，冷敲11.5倍和波！

（有線62及202周四凌晨2:45直播）
哥本哈根專和勁旅

皇馬喺前排順風順水，有事都變冇事，不過同市打吡失利就將問題全面引爆。比比率先喺場內與賓施馬上演一幕「潑婦罵街」，出手勸交嘅沙治奧拉莫斯近日被爆扭計加薪唔成同會長皮里茲擘面，皮里茲被指插手安察洛堤排陣拖垮戰績，安帥堅持重用懶懶閒嘅賓施馬，調兵遣將能力備受質疑，被擁躉無間斷「開汽水」招呼，連同門將卡斯拿斯自薦跳槽AC米蘭遭拒，一連串負面問題連鎖式爆發，今場踏入歐戰100場里程碑嘅C朗，真係想踢好波都難。

哥本哈根照秤嘅話，當然同皇馬冇得揮，過往8次鬥西班牙球會僅得4和4負冇威過，今場要爆冷贏波怕且好難，但佢哋喺隊長積及臣同瑞典沙場老將美爾保領導防線下，首輪爆冷賽和祖雲達斯確實令人眼前一亮。再者，呢支丹麥勁旅喺10/11年歐聯16強前赴史丹福橋，作客由安察洛堤領軍嘅車路士，最終成功以0:0全身而退，今趟造訪巴拿貝勢必照辦煮碗，趁住皇馬內亂搶分。
歐聯B組