派波飛益球迷造勢史雲斯嚇窒聖加倫

猪拉多纳

史雲斯今季繼續為球迷帶嚟驚喜，首輪歐霸盃分組賽一登場就大炒華倫西亞3蛋，今晚佢哋喺主場恭候A組另一對手聖加倫，會方為咗谷爆自由球場，賽前搞咗個免費派波飛行動，有大批鄉親父老入場梗要做番齣好戲，「讓球主勝」有2.08倍博得過吖！

（有線64及203周五凌晨3:05直播）
聖加倫射手斷腳長抖

最近有史雲斯球迷喺討論區提出訴求，希望會方搞搞新意思刺激入座率，估唔到班高層咁識做，決定免費送今仗同月底對古賓嘅歐霸盃主場波飛畀Fans，就算有球迷一早畀咗錢買飛，都可申請免費帶個Friend入場，咁識冧Fans，今晚自由球場肯定座無虛席。

雖然對手聖加倫已連續12場波未輸過，不過佢哋個射手史雲列文上星期斷腳面臨長抖，加上中場伊域同鋒將卡胡斯域仲養緊傷，陣容甩皮甩骨。反觀史雲斯有上輪分組賽坐波監嘅中場里安比頓刑滿，右翼柏保路靴南迪斯亦克服大腿傷患候命，由佢夥拍米捷同喺今屆歐霸盃入咗4球嘅韋菲特邦尼合組攻擊鐵三角，聖加倫點頂呀？
歐霸盃A組