西維爾尋「堡」易過借火

猪拉多纳

歐聯激戰連場過後，今晚輪到歐霸盃接力，H組有西甲球隊西維爾喺主場迎擊德甲嘅弗賴堡。西維爾傷兵潮雖然沒完沒了，教頭艾美利亦承認未搵到最佳陣容，但仍對歐霸盃充滿渴求，今場有喺德甲打滾多年嘅杜查奧斯基及拿傑迪錫過料破敵，要砌低防線紙紮嘅弗賴堡易過借火，吼實2倍「讓主」。

（有線64及203、廣東體育周五凌晨1:00直播）
弗賴堡防線紙紮頂唔住

西維爾中場卓利舒夫、中堅費蘭度拿華路接連受傷後，防守中場麥比亞日前證實創傷性關節炎要抖成個月，主帥艾美利坦言受傷兵潮影響，直到目前都未搵到「鎖匙人」，最佳陣容仍處於摸索階段。好在箭頭加美路及卡路士巴卡夠生性，最近4場夾埋攻入4球，鋒力有保證之餘，拿傑迪錫及杜查奧斯基兩名進攻好手，之前分別効力史浩克同漢堡多年，熟晒德國波條路，要撕破弗賴堡鬆散防線唔難。

另邊廂，撇除達列達與泰拿仙奴呢對中後場傷兵，弗賴堡其實都幾齊腳，可惜硬係踢唔到好波，德甲開咧至今冇贏過不特止，聯賽、德國盃、歐霸盃三線作戰，球員更加踢到殘，難怪球會主席富斯基拿喺球隊出發去西班牙前，都無奈拋低句「我哋冇得唔面對咁殘酷嘅賽程」。不過幾無奈都好，弗賴堡喺德甲場場有失波，今晚面對爭取歐霸盃6連勝嘅西維爾，難逃大敗。
歐霸盃H組