擁躉熱情紅鑽主場捉松鼠

猪拉多纳

小妹最近有好多新嘗試，好似球彩同娛樂台兩邊走，近排重涉足埋樓盤節目！為咗方便發掘話題，我都會走入戲院睇吓戲，近排睇咗套悲情戲，個結局睇到眼濕濕，但間戲院唔知搞乜，齣戲一完居然就開大燈，乜氣氛都畀佢破壞晒！

講起氣氛，大宮松鼠嘅球迷無論主場作客都唔慌谷得出氣氛喇！佢哋最近12場聯賽居然輸足11場，好在有個「奇迹上半季」，攞夠分「資本夠厚」，而家就算走晒樣都唔使擔心會降班。
松鼠攞夠分hea到季尾

松鼠門將江角浩司上場畀FC東京炒咗5球，乜信心都無晒啦！松鼠能夠喺上半季領放，最主要係外援路華高域狀態大勇，但佢最近打回原形，而同鄉好拍擋隆比真歷又受傷患困擾，所以松鼠最近咪好似無晒子彈囉！

松鼠今日要作客同巿宿敵浦和紅鑽，雖然主隊最近狀態都麻麻，幸好積分榜前列球隊接連失分先至冇被拋離咋，小妹就睇好佢哋呢場可以喺主場反底！紅鑽號稱「日職紅魔鬼」，主場球迷出名夠熱情投入，撞正呢場係埼玉縣打吡，班擁躉自然畀多三分力吶喊助威，紅鑽主場近5仗主場取得4勝1和，呢場都信得過嘅！

（有線61及201台周六下午３時直播）
妹頭推介：浦和紅鑽 勝