曼城智破拖肥金身

猪拉多纳

以「華」制「華」助攻王孭飛

堂堂「億萬大軍」曼城先輸畀阿士東維拉，跟手歐聯又大敗畀拜仁慕尼黑，真係乜面都冇，今晚重返英超對愛華頓，正係省靚招牌嘅好時機，領隊比歷連尼亦準備以「華」制「華」，搵傷愈嘅大衞施華肩負打爆「拖肥糖」不敗金身嘅重任，曼城讓半一要上盤！

（now621台周六晚7:45直播）
巴利借將身份被禁倒戈

曼城今季試過大炒紐卡素同曼聯，但又可以輸畀卡迪夫城同維拉，「海鮮」表現認真估佢唔到！查實留意番上輪鬥維拉場聯賽，論形勢同攻門次數都係曼城勝一籌，咁都攞唔到維拉命，唔多唔少係由於缺少施華呢類畀波一針見血嘅球員。周中曼城輸畀拜仁1:3，後備入替嘅施華助攻尼格度建功，末段仲有球罰球射中楣添，睇得出施華一落到場，曼城就即時生晒，呢位好波之人今晚復任正選，相信愛華頓個後防肯定有得震冇得瞓。

無錯，愛華頓係目前唯一一支英超不敗之師，但其實「拖肥糖」除咗喺上月中爆冷砌低車路士1:0之外，其餘兩場勝仗嘅對手只係韋斯咸同紐卡素，老實講今季未受太多考驗。況且生力軍巴利今仗因屬曼城借將唔准倒戈，冇咗呢位英超最後生「500仗先生」喺中場孭飛，「拖肥糖」真係爭咁啲喎！
球迷反對擔正 赫特失正選

雖然話另一位借將盧卡古近兩仗喪入3球，不過佢嘅比利時國家隊師兄高柏尼賽前就話，已經熟晒「新魔獸」嘅路數，盧卡古想惡得出樣都幾難。加上赫特喺對拜仁一仗連失兩個近柱波，尋日《曼徹斯特晚報》搞咗個投票，足足有7成球迷反對佢繼續擔正，雖然隊友拿斯尼賽前就聲援赫特，話佢同保方、紐亞及洛里斯等世界級門將係同Level，但比歷連尼就似乎想變吓，暗示用副選彭迪利蒙打正選，可能仲穩陣喎！
Data King 曼城主場必有波入

‧曼城連續53場英超主場賽事有波入。

‧愛華頓對上1次聯賽4連勝要追溯番2008年3月。

‧雙方近3仗都係開大。
乜都玩錦囊 愛華頓後防穿窿博開大

愛華頓近仗失球數字大增，對上3場波就足足失咗6球，一對左右閘史密斯高文同巴尼斯都係攻強過守，加上防中巴利今仗唔出得，英超「入球王」曼城（6戰入14球）隨時大開殺戒都似，1.7倍大玩得過。