哨牙蘇氹粉絲紅軍拆水晶宮

猪拉多纳

利物浦喺今晚英超主場對水晶宮，場波除咗係第二鬥尾二外，亦係紅軍射手蘇亞雷斯復出後首次喺晏菲路主場出戰，呢位烏拉圭射手為咗修補同球迷關係，肯定施展渾身解數入多幾粒，1.48倍「讓主」攞嚟過關都唔錯。

（now621台周六晚10:00）
水晶宮守死球英超最差

冇人會懷疑蘇亞雷斯嘅突破力同把握力，不過上季咬人事件同季初要脅離隊，的確傷透利迷嘅心。但只要「阿蘇」繼續入波，紅軍球迷仲點會繼續嬲佢，今晚對水晶宮就係佢氹番球迷嘅好機會。況且隊長謝拉特今季憑死球已經炮製咗8個入波「餐士」，位列英超第一，咁啱對手水晶宮唔擅長防守死球，佢哋同新特蘭一樣失咗5球係英超最差。就算紅軍中場缺少菲臘比古天奴同盧卡斯，都唔驚佢哋炒唔起。

水晶宮賽前傳出領隊荷路維同前鋒查馬克因上仗插水一事不和，今仗可能會收起呢位射手，咁做更難威脅利物浦大門。而且佢哋條防線好似不設防咁，開季至今場場有失球，守將迪米恩迪蘭尼又未好番，睇怕門將史巴朗尼今晚真係有排忙。