慕遜地頭出擊「特」別勁

猪拉多纳

3戰3勝喪入11球

出年係世盃年，德國貴為熱門之一，依家當然要培養定啲新血增強實力啦，慕遜加柏前鋒麥斯古斯，就係其中一個極速上位嘅日耳曼兵！雖然新季只係開始咗兩個月，但唔少球評家已認定麥斯古斯係全德甲最佳收購，慕遜戰鬥力比上季更強，今晚喺無敵主場迎戰「蜜蜂兵團」多蒙特，有分落袋唔奇，既然受讓，幾大都撐2.18倍嘅「+1」讓球主勝！

（有線64及203周六晚9:30直播）
多蒙特想簽香川仔回巢

麥斯古斯加盟慕遜加柏後，已經攞到4個入波同4次助攻，表現相當出眾，難怪德國傳媒都普遍認為，萬一費倫件馬里奧高美斯有咩冬瓜豆腐，麥斯古斯都會係最理想嘅替補啦！依家古斯仔同拉菲爾、靴文及艾蘭高係慕遜嘅四把尖刀，個個都有番咁上下入球能力，睇埋主場表現，查實慕遜加柏非常對辦，3仗主場戰贏晒之餘，仲要每場都贏3球（兩場4:1、一場3:0），加加埋埋入咗成11球，呢3場波麥斯古斯都有士哥，今晚繼續發威又有乜出奇先？

多蒙特唔使問都知係德甲一流勁旅，不過佢哋家陣有比薛斯基、舒姆沙同根度簡養傷，成日受傷患困擾嘅後衞曉姆斯狀態亦未操起，仲要周中先喺歐聯同馬賽大戰咗一場，今晚造訪養精蓄銳嘅慕遜難免蝕底，英國《每日星報》話多蒙特想喺1月簽香川真司回巢，不過依家都係要原班人腳頂住先。最重要係多蒙特近3季作客慕遜加柏只得2和1負，呢場波又點會無啦啦讓得起對手呀？
頂占筍盤：慕遜加柏（讓球主勝）