PSG 10月之星再o趙私房「賽」

猪拉多纳

今晚法甲馬賽喺主場對巴黎聖日耳門，受讓都博唔過，因為伊巴謙壽星佬當旺，加上佢加薪續約冇耐要騷哥利，熱捧聖日耳門1.83倍客W。

（開賽時間：周一凌晨3:00）
馬賽近5次對賽輸4鋪

聖日耳門周中喺歐聯主場以3:0大勝賓菲加，今季表現普通嘅伊巴謙莫域終於發威連o趙兩粒，為自己送上最佳生日禮物，大家知啦，最近佢扭計成功又加人工，上場波又因為堤亞高施華養傷，獲得教練白蘭斯安排做隊長，要知道伊巴謙莫域上年10月攻入4球，或者10月真係佢「旺季」都唔定，今晚隨時又有士哥。

另方面，馬賽周中喺歐聯嘅命運正好相反，作客淨吞多蒙特3蛋，主要原因當然係食胡射手基格納因傷缺陣，搞到前線冇人孭飛啦。雖然有消息話基格納今場有機會復出，但聖日耳門後備力量始終強得多，應付緊密賽程有好大優勢，更何況兩軍近5次對賽，聖日耳門贏足4次咁多，呢場添食難度唔大吖！