熱刺扑「錘」 由頭嬴到尾

猪拉多纳

英超開季前，各界都認定曼市雙雄同車仔係爭標三頭馬車，利物浦、阿仙奴同熱刺最多只係爭第4。不過6輪比賽過後，排喺積分榜三甲嘅正正就係阿仙奴、利物浦同熱刺！當中最令人驚喜同穩定嘅，就肯定非熱刺莫屬！勢估唔到熱刺冇咗加里夫巴利反而仲勁，今晚佢哋主場迎戰同市死敵韋斯咸，贏面極高，小妹推介有2倍分頭嘅「主主」！

熱刺王牌加里夫巴利轉投皇家馬德里，「帶挈」熱刺袋咗成10億港紙，不過呢間倫敦球會竟然全數攞晒去增兵，可見佢哋今季嘅決心真係好大。喺咁多位新球員入面，小妹最欣賞嘅係前華倫射手蘇爾達杜、巴西中場荷西保連奴同川迪指揮官查迪尼。呢3位仁兄開季至今各自已取得2個「士哥」，狀態好之餘，仲睇得出佢哋已經融入晒熱刺嘅踢法，嚟緊默契再好啲，熱刺嘅鋒力真係唔講得笑！以前佢哋淨係靠巴利數胡，家陣就個個都識入波，咁梗係令對手防不勝防啦！
近8戰6次開「主主」

新人搶風頭，舊人一樣唔輸蝕o架。英格蘭射手迪科爾近期搶爆鏡，開季至今已經有5球斬獲，狀態弗到連三獅軍領隊鶴臣都忍唔住重召佢入伍！個個都咁勁，難怪熱刺近6戰5勝1和未輸過，當中仲有5場係零失球啦！仲有一點，就係小妹留意到熱刺近8場比賽，當中有6次都喺上半場已經有入球，由頭贏到落尾，既然今鋪個主W熱到得1.35倍，咁倒不如撐「主主」咪仲好！
韋斯咸換邊前例食白果

另邊廂，客軍韋斯咸開季成績認真麻麻，6場聯賽只得1勝2和3負，最大鑊係安祖卡路爾受重傷，搞到「錘仔幫」鋒力極度疲弱，雖然英格蘭小將拉夫摩利臣連續2場喺英超同英聯盃上陣都有入球，但佢始終都係新丁，經驗輸蝕，今晚面對熱刺條防線，又點到佢為所欲為先？睇埋韋斯咸近4仗聯賽，當中有3次換邊前都入唔到波，憑乜去阻止熱刺開「主主」呀！