同個夢想賽績夠照

猪拉多纳

　　今日沙田10場賽事，有部分場次好似形勢清晰，可以爭入前列嘅馬，數落得三幾件，最終賽果係咪咁？但願如此，起碼有得刨。如果喜歡買熱門嘅馬友，呢日應該幾好賭。而阿棟今日貼士，比較着重三兩個馬房嘅出賽馬，睇落佢哋會「開飯」。

　　第七場三班1400米。都唔知咩原因，「同個夢想」上季1場都贏唔到，跑咩路程，邊個騎都好，硬係三三四四，連Q都撻埋，認真嘔血，惟有話佢上季仲細，未成熟，希望今季進度起飛，可以交出一點成績。

　　1400米路合

　　如果睇「同個夢想」賽績，有1場柏寶走位蝕到阿媽都唔認得，但可以追到「牛精好友」氣咳，邊會係第三班馬！初出田草1400米，路程夾啱，贏得。

　　第八場三班1200米。「貝利奇」一定熱到飛起，獨贏有兩倍半，已經算好，賠率係乏味冇得避嘅事，勝在幕後鬥志好，實搏，唔使諗咁多。而上季第1次跑三班，終點線上輸少少跑第二，係就係冇運，亦證明到三班根本冇阻力。今季上梗二班之馬，初出遇上一群普通對手，贏馬冇難度。

　　第十場二班1400米。「海鑽石」最適合唞唞埋埋搏，前季一出即勝，上季又係一樣，已經知道大摩點樣部署，冇理由今季忽然轉計劃。

　　此駒之前在二班贏得「得盛」和「勁勢」，反映分量十足，今場排到1檔，一定會守靚位，唔使擔心昌哥走位笨拙，有力食尾胡。

    （陳華棟 資深評馬人）