歐國聯 絕非鋤強扶弱

猪拉多纳

歐洲國家聯賽將國家隊賽事「歐聯化」，製造多場歐洲一線球隊硬撼嘅話題對決，肯定成為球壇焦點。歐洲足協已將電視轉播權統一管理，若然佢哋手頭上揸住多場重量級戲碼，咁就有大把本錢招來贊助商同合作夥伴，到時本來冇乜收視嘅太公波變成一粒大金蛋，歐洲足協大佬柏天尼必定攞晒彩。
國腳級球星更加踢殘

不過，「歐國聯」將強、弱旅拆開晒，「強強對決」當然吸引，咁「弱弱碰頭」點算先！安道爾同聖馬力諾呢類魚腩長期水鬥水，無助提高水準，話就話有升降制度，但唔通望佢哋殺上頭嗰幾個級別咩！長此下去，好易造成強者愈強、弱者愈者嘅情況，令歐洲國家級別賽事出現嚴重斷層。柏天尼之前成日懶係鋤強扶弱咁，似乎呢個大計同佢之前嘅理念背道而馳噃！

另一個令人關注嘅問題係「歐國聯」會否加重球員比賽數量，歐洲頂級球會一季閒閒哋都有五、六十場波打，加埋代表國家隊踢世界盃及歐國盃外圍賽賽事，唔少國腳級球星搏到殘，若然仲整多個「歐國聯」加重負擔，恐怕會搞到怨聲載道。