富明尼斯 甘美奧死火冇攻「細」

猪拉多纳

今周雖然係國際賽期，但巴甲一於照踢，聽日清晨就有富明尼斯主場迎戰甘美奧，兩軍被國家隊徵召嘅球員都唔多，可以全力一戰，可惜佢哋一班射手近排腳風都欠順，難望開入球騷，都係捧1.52倍入球細啦。

（開賽時間：周日清晨5:30）

甘美奧家陣喺巴甲排第2，近7場賽事亦都只係輸過1次，但其實佢哋只係靠近6場有5次冇失波嘅硬淨嘅防守搵食，反觀火力方面可以話係極差！呢隊波近8場有7次開入球細，仲冇一次入多過1粒，一班前鋒如巴高斯同伊度亞度華加斯全部化身「不射男」，又點望佢哋省多兩粒呀？
射手費特長期養傷

富明尼斯近況亦都頗「頹」，近5戰得1勝之餘，其中4次都開細，同佢哋位王牌前鋒費特長期養傷不無關係，頂上嘅拿費爾蘇比斯入球效率亦唔高，近6場就只得1球進帳，難望可以領軍取得「士哥」。至於正選門神迪亞高卡華利尼雖然要踢國家隊，但係對住啞火嘅甘美奧，就算用後備龍都唔會有太大分別，啱晒佢哋做「細」界喇。