一對馬轉泥搵食 文家良7、8場考膽量

猪拉多纳

　　今晚文家良馬房派出6駒迎戰，「飲食之星」及「寶寶飛龍」兩匹馬，今季成績應該令大家難以忘懷，賽前捧到熱一熱，跑完連P都冇！呢對馬今次約埋齊齊轉跑泥地，係佢出賽以來第1次，轉場一定收復到失地？只有練馬師最清楚，我輩馬迷估估，買唔買，考大家膽量。

　　呢對文馬剛剛輸完，潘頓係都唔放手，「寶寶飛龍」尚且可以話畀多次機會，初出未夠態嘛，但「飲食之星」已經輸又再輸，其實冇乜藉口，點解係都唔放手？仲想累街坊？真係奇怪，唔通潘頓知道隻馬有後。

　　飲食之星出自泥地大族

　　「飲食之星」及「寶寶飛龍」呢對馬泥地未跑過，泥閘試得唔多，大家各試1次，成績1冠1亞，係咪泥地特別勁，唔跑唔知，不過，「飲食之星」來自泥地家族Elusive City，先天足夠，應該有個譜。

　　講到「寶寶飛龍」，八月尾泥地大閘贏得漂亮，可能係驅使練馬師轉換場地試試原因。應唔應付得到？講到尾，冇人敢寫包單，惟有信埋今次，隻馬泥戰潛力仲有手。亦因為練馬師肯作出改變，唔跑田草，又唔等谷草，揀泥地，貪對手唔強，或者得米。