拜仁show統治力復仇緬恩斯

猪拉多纳

德甲班霸拜仁慕尼黑今季換上新帥哥迪奧拿，經過季初一輪磨合後已開始顯露超強猙獰面貌，近期表現堪稱恐怖，今晚主場面對曾吃過多次苦頭嘅緬恩斯唔會大意，加上緬恩斯實力同近況都嚴重下滑，拜仁大勝冇難度，「讓球主客和」讓到兩球都冇問題，照捧1.8倍讓球主勝。

經過季初一段摸索期，哥迪奧拿終於可以令拜仁眾星盡展所長，而且慢慢融入佢嘅足球理念，近期每仗表現都有令人驚喜進步，歐聯作客輕取曼城已顯示王者本色，上輪聯賽作客對今季主場全勝嘅三哥利華古遜雖然和波，但全場射門比率為27:5，控球指數高達78%，連利華主帥希比亞都承認，拜仁喺比賽中盡show統治力，利華攞到一分簡直僥倖。拜仁下周中歐聯只係主場對弱旅柏辛域陀尼亞，今晚無後顧之憂下必全力出擊。

緬恩斯喺少帥杜曹手上，近季曾三勝拜仁，但上次贏拜仁已經係兩年前嘅事，當時嘅入球功臣賀治比、舒賀爾尼同施沙拉爾都已經走晒，球隊實力嚴重下滑，經過季初一輪急攻後近期亦全面回落，呢班波作客不擅死守，近兩場作客面對利華古遜同哈化柏林都大敗而回，今晚更難逃被大炒厄運！