多蒙特「諾」力開入球騷

猪拉多纳

防線唔掂喪攻搭夠

德甲今晚爆發連場大戰，其中喺國際賽休戰前畀慕遜加柏破咗不敗身嘅多蒙特，今晚雖然喺主場迎戰漢諾威，但唔係話無顧慮o架。事關「蜜蜂兵團」除咗傷兵成籮，仲有盛傳下季會過檔巴塞嘅主力中堅曉姆斯停賽，最大鑊係佢哋下星期二歐聯又要作客大戰阿仙奴，今晚對住依家排第五嘅漢諾威唔一定贏硬，與其博W，倒不如捧1.93倍入球大仲好。

（有線64及203周六晚9:30直播）
中堅曉姆斯停賽影響大

多蒙特依家有馬高列奧斯、舒姆沙、根度簡同施雲賓達等十字軍，雖然話紐尼沙軒有機會復出，但「蜜蜂兵團」踢埋呢場波之後，就要迎接連串魔鬼賽程，未來4戰分別要兩鬥阿仙奴，又要對史浩克04同拿玻里，場場都咁難啃！

唔單止咁，最慘係多蒙特今晚仲有後防重心曉姆斯停賽，防守力大幅下降，相信教練高普幾唔想都要焗住以攻為守，靠「喪攻三劍俠」羅拔利雲度夫斯基、奧巴美揚同米希達利恩等前鋒全力數胡，去彌補後防嘅不足！
漢諾威箭頭迪奧夫復出

係，雖然對面嘅漢諾威喺近兩場聯賽都開唔到W，只得1和1負拎得嗰1分；轉戰德國盃又慘被拜仁大炒，科特迪瓦前鋒耶高蘭又話重傷，要抖到出年1月先復出，表面上好似問題多多，好彩，喺呢個危急關頭，另一件非洲射手、塞內加爾嘅馬美迪奧夫養傷近1個月後終於復出，呢位前曼聯鋒將喺受傷前踢到曉飛，入波助攻瓣瓣有，若果佢能夠踢番受傷前嘅表現，漢諾威嘅火力絕對唔可以睇小！既然係咁，兩軍今晚一於玩「大」佢啦！
頂占筍盤：多蒙特（入球大）