好香港易配再搏

猪拉多纳

　　今日莫雷拉開始長駐在港策騎，睇過呢位好手之前表現，陣上充滿朝氣，身懷好武功，又唔係得鋪牛力，放頭又掂，鬥後勁又得。他朝可能係另一個韋達亦唔定。但一切言之尚早，站穩陣腳後，睇吓得到邊幾個大馬房撐腰，先至再講。

　　第五場四班1200米。「好香港」前季養喺阿成個倉，跑過3亞1季，上季轉飯鑊前後，二奶條命改唔到，一再以短頭屈居人後，唔係運氣，都唔知仲可以賴乜！

　　巫斯義擅鬥後勁

　　今季復出一戰，搵到韋達，但睇賠率比較軟弱，臨場仲愈賣愈冷，已心知不妙，結果直路得個「追」字。呢次轉用巫斯義，騎後勁會好過韋達，希望交番出力追「橫掃千軍」、「大哥哥」嗰段後勁，咁就有行。

　　第九場三班1650米。「多多利」成日行圈幾急，情緒好易受到周圍環境影響，陣上又唔多聽話，好多時直路一發力就內閃，咁難搞嘅馬，真係考起師傅。

　　「多多利」今次用到莫雷拉，唔使再擔心騎唔起，阿苗加多樣配件，亦希望改善隻馬走勢，相輔相成之下，呢匹馬應該係時候出頭。

　　第十場二班1800米。「喜競寶寶」如果仲係好似上賽負重達133磅，阿棟會走夾唔唞，好在負磅減輕，又轉回谷草，條件真係唔同晒。

　　此駒假假哋當日贏緊「威利加數」，呢項路程威力的確勁，繼續由潘頓騎，預咗跑法進取，一定唔會蝕，WP玩得過。（陳華棟 資深評馬人）