雲帥揸旗喪入7粒 漢堡開騷益「大」「加」

猪拉多纳

有留意今季德甲嘅朋友，一定會認同漢堡係最有娛樂性嘅球隊之一，尤其係前荷蘭國家隊領隊雲馬維克上任後，呢班波有理冇理即刻大踢進攻足球，近2戰加埋入咗成7球波咁多，今晚佢哋喺主場迎戰火力都係咁勁嘅史特加，大有機會合演一場入球騷，唔使問「阿占」，1.54倍「入球大」一定要捧場！

（有線61、64、201及203周日晚9:30直播）

自從雲馬維克接過漢堡帥印後，就將班波打造成以往佢教荷蘭嗰陣嘅全能喪攻雄師，正因為咁，漢堡班進攻好手即時生晒，當中最大得益者，當然係隊長雲達華治啦！呢位荷蘭國腳今季表現相當搶鏡，上仗仲有1個士哥加兩個助攻添，狀態弗到漏，睇怕史特加班守將都好難Mark得住佢喇！
雲達華治 拉蘇加弗到漏

除咗雲達華治，代替已離隊嘅孫弘民擔任正箭頭嘅年輕射手拉蘇加，今季一樣予人驚喜，呢位德國新星自雲帥接手後，2戰就已經勁入4球，令漢堡鋒力升晒呢，上仗佢哋作客以5:0蹂躪紐倫堡，絕對係有真材實料o架！之不過咁，漢堡鋒力雖然係恐怖，但最衰係佢哋條防線一樣「恐怖」，失球數字係全德甲第二多，試過喺主場被賀芬咸炒5:1、又曾經作客被多蒙特炒6:2，淨係呢點，都知與其博W，不如玩入球大咪仲好！
史特加踢德甲例有波入

尤其係對家史特加依家排喺積分榜前列，實力有番咁上下，佢哋成功嘅關鍵，就係靠穩定嘅入球能力，睇番今季聯賽，史特加只係得一場波食白果，王牌射手伊比斯域啱啱仲帶領波斯尼亞殺入世盃決賽周，士氣狀態都有保證，今晚遇着喪攻王漢堡，入波又點會少呀？
Data King 兩軍對賽未試過和波

‧雙方近20次碰頭必分勝負，各贏10場。

‧史特加射手伊比斯域今季14戰攻入11球。

‧漢堡箭頭拉蘇加近3場入5球，平均每球約需52分鐘。
頂占筍盤：漢堡（入球大）