祖記慢熱半和有保證

猪拉多纳

費倫天拿難破宿命

15年，費倫天拿足足15年未試過喺法蘭基球場擊敗祖雲達斯，今晚雙方喺意甲交手，「紫百合」當然想打破宿命，奈何呢支佛羅倫斯球隊嘅狀態真係沉，想喺祖雲達斯身上攞着數有難度，考慮到「斑馬兵團」今季表現較慢熱，吼2.1倍半場和最明智。

（now818台及TVB13周日晚9:00直播）
紫百合主場15年未威過

費倫天拿自從馬里奧高美斯打柴之後，入波重任靠晒基奧斯比羅斯，亦可能因為樹大招風搞到佢冇啖好食，「羅斯仔」近3場聯賽只係入得1球12碼，係佢哋連續3場意甲失分嘅主要原因，況且佢哋近15年喺自己地頭鬥祖雲達斯都未威過，主場似乎冇乜優勢喎！

對家祖雲達斯照秤係高啲，但考慮到禮拜四凌晨要喺歐聯造訪西班牙鬥皇馬，班球員會唔會勒住踢好難講。後上扣關能力一流嘅維達爾，因為周中代表智利踢完世盃外之後遲咗歸隊，教練干地講明會罰佢做後備，而且胡仙歷同加利亞雷拉又養緊傷，「斑馬兵團」想咬得入費倫天拿唔容易。

睇番數據，祖雲達斯今季意甲7戰係贏咗6場，但當中只得兩場係半場領先，表現都幾慢熱，造訪今季意甲半場僅得1次落後嘅「紫百合」，梗係吼半場和啦！