小倫敦打吡捱細界

猪拉多纳

水晶宮未夠班 富咸死晒火

今晚英獨腳戲上演「小倫敦打吡」水晶宮主場對富咸，兩支難兄難弟演出同樣不濟，新升班嘅水晶宮根本唔夠料喺英超立足，空有一班「知名」前鋒，但實際上只屬布景板，威脅力欠奉。富咸亦唔好得去邊，早前主場輸畀另一支升班球隊卡迪夫城，睇怕佢哋今仗唔敢逞強，以穩字行先。馬會將入球細壓低至1.65倍畀埋貼士，千祈咪走寶。

（now 621周二凌晨3時直播）

水晶宮擁有上季英冠神射手格連梅利，但佢偏偏正值受傷長抖，至於40歲名將菲臘斯年事已高，已無法跟上英超比賽節奏，而前阿仙奴射手查馬克依然冇建樹，搞到球隊變另類「無鋒陣」，踢7場聯賽，輸6場僅入5球，可謂任由對手宰割，今戰對富咸就算有地利，都難以對佢哋存有希望。

富咸一樣係「衰波」，進攻瓣數單調，入球率極低，最明顯例子必數英聯盃圍攻乙組仔伯頓90分鐘，都只係入得1粒咁大把。前鋒貝碧托夫有傷在身上陣成疑，球隊靠晒戴倫賓特食胡，想攻入水晶宮大門，肯定困難，熱捧入球細。
切爾達沉爆難讓利雲特

另外，兩場西甲亦值得留意，切爾達8戰僅1勝，且近4仗只入1球，狀態極差，有主場之利都讓唔起利雲特，力撐讓球客勝。另一場維拉利爾今季演出令人驚喜，皇馬都贏唔到佢哋，今仗作客畢爾包，有得受讓平半，捧維拉利爾下盤。