馬體會搵維也納出氣

猪拉多纳

歐聯G組賽事，奧地利維也納主場對馬德里體育會，西甲馬體會開季聯賽八連勝嘅佳績終於斷纜，但球隊今季攻力強勁，對住近五場主場皆不勝嘅維也納，博馬體會反彈，要讓球客勝。

馬體會開季聯賽8連勝，點知上場作客輸畀愛斯賓奴0比1，真係令人大跌眼鏡，今場歐聯難得對住同組實力最弱嘅奧地利維也納，誓要搵佢哋做出氣袋。馬體會今季鋒力超勁，9場聯賽攻入21球，比皇馬仲要多兩球，搶手新貴迪亞高哥斯達射得又爆得，以十個入波暫成西甲神射手，勁過晒C朗同美斯，今仗對住近況好差嘅維也納梗係要用入波嚟大肆發洩。
洛達咸遇弱借勢反彈

同日推介兩場英甲，洛達咸主場對燦美爾，雖然洛達咸近兩仗都輸波，但兩仗都係鬥強隊，今仗對住近期輸多贏少嘅弱隊燦美爾，正係反彈好時機，捧主W。另一場史雲頓主場對華素爾，睇落去四連勝嘅史雲頓佔優，但華素爾近場五作客皆不敗，而且對手多為英甲前列球隊，受讓值捧。