巴塞玩殘無鋒AC

猪拉多纳

美斯加薪至2億又壓住C朗

嚟到周中，又係歐聯重燃戰火嘅時候喇！今晚H組有意甲勁旅AC米蘭迎戰西甲「一哥」巴塞隆拿，「紅黑兵團」已連續3屆喺歐聯同巴塞碰頭，記得上屆8強首回合AC以兩球淨勝「地上最強」，可惜次回合輸番4粒，被技術性擊倒出局，功虧一簣。雖然近年巴塞作客聖西路未試過拎到甜頭，但整體實力確係高一班，而且剛啱復出嘅美斯又傳會加人工，張峰相信今晚巴塞可以反客為主，2.28倍「讓客」不妨一試！

（有線64及203、CC5周三凌晨2:45直播）
「腦殘」 肌肉康復進展好

AC米蘭依家喺小組兩戰得4分，出線形勢睇落唔錯，但上輪佢哋作客阿積士喺驚險萬分之下先保住1分，當時阿積士90分鐘先開紀錄，補時階段「紅黑兵團」憑住巴洛迪利嘅一個「問題12碼」入波，火速追和收場，可以話和波都執番身彩。

事實上，AC今季喺聯賽表現亦都跌watt，8戰過後落後榜首嘅羅馬13分，家陣前線一對入球孖寶巴洛迪利同艾沙拉維仲要有傷，但係「腦殘」嘅肌肉康復進展唔錯，等埋最後一課練習之後，就知落唔落得場，不過後防大將迪斯基利奧同埋後備門將基比爾始終唔掂，教練阿里基未開波已扯白旗話惡踢，連卡卡都話未搵到比賽節奏，要學似上年主場對巴塞淨勝兩球，難啲囉！
佩奧爾復出後防夠穩陣

另邊廂嘅巴塞隆拿，剛喺西甲悶和奧沙辛拿0:0，肯定谷埋一肚火，好彩係早前大腿後肌受傷嘅美斯已經復出，上仗亦有落場，相信經過一場熱身後應可操Fit番狀態，最緊要嘅係西班牙《世界體育報》爆料話巴塞打算喺年底前將美斯嘅人工，由年薪1,600萬歐元大幅提升至2,000萬歐元（約2.12億港元），壓過C朗拿度嘅1,700萬歐元成為世界最高年薪球員，「球王」為咗賺多啲奶粉錢，當然要加多兩錢肉緊搏表現啦！

後防方面，受長期傷患困擾嘅老大哥佩奧爾亦康復，對全隊上下都係一個鼓舞，更何況「地上最強」近7戰只係失過兩球咁大把，今晚作客聖西路對住啞火嘅AC，又使乜驚吖，作客讓一球照撐！
雙方對賽演慣入球騷

兩軍近6次對賽，有4次開出入球大，全部至少出現4個入球。

巴塞近8戰開出5次入球大。

美斯喺近14場歐聯賽事攻入10球。
美斯歐聯效率高首球之選

美斯喺歐聯嘅入球效率一向極高，呢位歐聯史上第4射手今仗終於可以全面復出，餓咗波咁耐，相信會拎AC米蘭祭旗，首球有2.55倍咪嫌熱；至於未喺歐聯「開齋」嘅新援尼馬，亦想用入波嚟證明自己未來球王地位，不妨作為次選。
歐聯H組