阿仙奴搞唔掂蜜蜂

猪拉多纳

「翼鋒替工」塞晒喺中路

拜仁喺歐聯對上一圈清風送爽3:1打贏曼城，班德甲躉不知幾高興，今晚輪到上屆亞軍多蒙特作客阿仙奴、同埋史浩克04主場對車路士，啲「德粉」梗希望呢兩隊德甲球隊可以威多次！兩場當中，小弟就向F組嘅阿仙奴對多蒙特埋手，捧多蒙特受讓平半下盤！

（有線61、201周三凌晨2:45直播）
廠仔禾確特操練再傷抖多兩周

兵工廠喺死亡F組兩戰全勝排榜首，不過佢哋進攻太過依賴中場線，前鋒除咗基奧特之外根本無人可用，今場對住大踢穩守突擊波嘅多蒙特，隨時老鼠拉龜無「碇」埋手。廠仔有辛迪卡索拉可以候命，但原先話會復出嘅禾確特，喺操練期間又傷多鑊，領隊雲格話佢至少要抖多兩周起碼3場波唔使預佢，包括今場對多蒙特同英超對車路士。搞到卡索拉同艾朗藍斯、路斯基、韋舒亞等頻頻畀雲格調咗去踢翼鋒，讓個中場畀奧斯爾同阿迪達等人，可惜班「翼鋒替工」本性難移，好自然就會走入中路搵食，搞到兩邊冇人但中路又大塞車，大大減低進攻效率。
多蒙特高普停賽舒姆沙有傷

多蒙特雖然有舒姆沙等主力有傷，教練高普呢場又要坐波監，只可以喺看台遙控。但咁樣反而令班「蜜蜂兵」疊埋心水打好防守，以不敗為目標，尤其佢哋前面有奧巴美揚呢啲高速度球員打反擊，更加可以大安旨意去踢穩守突擊戰術，阿仙奴要撕破多蒙特嘅密集防守都唔容易。

唔好忘記，多蒙特班德國國腳已經熟晒阿仙奴奧斯爾同梅迪薩卡嘅路數，只要守住奧斯爾，就會大大減低兵工廠火力，何況多蒙特門將維丹費拿仲要為入選世界盃決賽周努力，呢場大戰就係佢騷「哥利」嘅良機，所以我信多蒙特絕對有力頂住兼作客搶分！
兩軍對賽頻開半和

阿仙奴歷來26次鬥德國球會得13勝5和8負。

阿仙奴中堅梅迪薩卡効力德甲期間，16次鬥多蒙特僅5勝。

兩軍近4次交手，3次均開出半場和。
頂占筍盤：多蒙特（下盤）

歐聯F組