莫路沙拉迪勁弗 沙士菲主場打「小人」

猪拉多纳

返咗阿根廷祖家之後，前拉素鋒將莫路沙拉迪腳風愈嚟愈順，聽朝沙士菲响阿甲主場迎戰小阿根廷人，佢好大機會又有「士哥」，1.54倍沙士菲主勝諗得過。

（開賽時間：周三早上7:15）

坦白講，沙士菲、小阿根廷人近期表現只算一般，不過兼顧阿甲、南球盃兩條戰線嘅沙士菲始終質素高啲，近6場波攞到3勝1和2負，總好過聯賽作客已經4戰不勝嘅小阿根廷人。早兩日1:0小勝競賽會，終止兩連敗嘅沙士菲，勝在有個莫路沙拉迪衝鋒陷陣，呢件回流球星近6場省入5球，公認係目前阿甲最弗嘅前鋒。
小阿根廷人場均入唔到一粒

查實小阿根廷人都有個當弗嘅射手，就係丹尼爾維拿華嘞，呢位仁兄前日主場對住學生隊，就整咗腳28米嘅致勝遠射，結束咗隊波聯賽5戰不勝嘅走勢。問題係小阿根廷人火力薄弱，12場波至入得嗰10粒，明顯靠丹尼爾維拿華一個獨力難支。

由於4日裏面要打兩場波，雙方嘅體力都可能存在問題，咁嘅環境應該就對主隊沙士菲有利啲嘞，起碼佢哋有一大班Fans打氣，鬥志點都有保證啲，何況佢哋做足晒工夫，尋日復操就拉大隊浸冰水消除疲勞，點都舒服過仲要舟車勞頓作客嘅小阿根廷人。最重要嘅一點係，由2007年起計，呢兩班波交親手，主隊一方個W低過2倍出現過7次，結果有5次順利開出主勝，今場冇理由唔博沙士菲啫。