有晒條件反彈 吳創木睇好辣得喜

猪拉多纳

伍碧權榮休之後，「辣得喜」加盟蘇偉賢旗下，馬主吳創木希望可與新倉主合作擦出火花。他說：「『辣得喜』今季跑過兩仗皆落敗而回，全因受制於偏外檔位，對呢匹需要守好位嘅馬根本難有發揮空間，實屬非戰之罪；而前一仗跑快活谷夜賽，臨場更加情緒欠穩定，早段兩度失蹄，早呈敗象，希望今次蘇偉賢幫匹馬重新戴上眼罩同頭罩後，可以唔再受周圍環境影響，令到競賽情緒更加集中，跑回應有水準。『辣得喜』雖然年屆7歲高齡，但目前評分已降至新低，有輕磅之利，只要有好檔同形勢配合，有權交出好成績，今戰抽到3檔正合發揮，有信心係時候作出反彈。」