紅魔剃蘇細孤力弱

猪拉多纳

莫帥技窮又唔團結

陷入「後費格遜危機」嘅曼聯，將於今晚歐聯A組主場迎戰皇家蘇斯達。費Sir榮休後，紅魔鬼猶如失去靈魂，冇信心、欠血性、缺鬥心，仲鬧不和，鬥勁旅處下風，遇上弱隊亦踢到慌失失，上仗英超又失分。領隊莫耶斯處處碰壁，似乎已黔驢技窮，現時非常時期，最緊要維穩，今仗或採用「煲魚生粥」保守戰術，但求袋3分已足夠，主Ｗ過熱唔抵玩，寧博2.1倍入球細。

（有線64及203台周四凌晨2時45分直播）
尹佩斯朗尼冇晒火

曼聯以往領先下會繼續強攻，落後更加會踢出無限拚勁，爭取反勝。依家情況相反，先入波反而令人擔心會被追和，先失波則翻身乏力。講到尾都係莫耶斯欠缺費Sir嘅魅力及威嚴，管唔掂班球星，朗尼以前同佢有心病，依家連尹佩斯都不滿莫帥訓練方式，難怪呢位荷蘭射手今季產量大減。莫耶斯得唔到主將支持，根本要求唔到球員踢出有霸氣嘅悅目足球，所以紅魔鬼今季每場賽事入波數字往往一球起、兩球止。

曼聯上仗鬥修咸頓，莫耶斯臨尾用基斯史摩寧入替朗尼，想保勝果，充分反映佢心怯。更何況莫帥歐戰經驗不足，面對稍為「陌生」嘅皇家蘇斯達，睇死佢都唔敢輕舉妄動，可以贏波已經要還神，仲點敢奢望大勝。
蘇斯達人貴自知輸少當贏

皇家蘇斯達人腳質素有限，兼顧唔到雙線作戰，聯賽成績急插水，歐聯分組賽亦兩戰兩敗，未夠班喺呢項大賽立足。踏入9月後，9場賽事僅1勝入6球，攻力差到暈。蘇斯達處於進退失據尷尬局面，既然無力喺歐聯創一番作為，不如將重心放回西甲，以免重蹈另一支西甲球隊切爾達03至04年球季分心歐聯，搞到降班嘅後塵。蘇斯達戰意成疑，估計對曼聯大門威脅有限。