曼城個個弗翻轉莫斯科

猪拉多纳

歐聯D組賽事，莫斯科中央陸軍主場迎戰曼城，睇番該組目前形勢，超晒班嘅拜仁兩戰兩勝得六分，莫斯科中央陸軍及曼城同得三分，實力較弱嘅柏辛域陀尼亞零分，可見莫斯科中央陸軍係曼城出線淘汰賽嘅最大競爭對手，曼城為免夜長夢多，今仗為取三分定必搏命，1.64倍客勝可取。

（有線61及64台周四凌晨零時直播）

曼城上場作客輕取韋斯咸3比1，取得聯賽作客首場勝仗，前鋒阿古路狀態弗到漏，上場梅開二度外更交咗一個助攻，如果唔係韋斯咸門將積亞基連倫力挽狂瀾，阿古路已可食出「大三元」，所以佢絕對係主隊一大威脅，而且曼城隊內中前場個個都有入球能力，對住防守弱雞嘅莫斯科中央陸軍，絕對可以贏波而回。
中央陸軍飄忽難捱

莫斯科中央陸軍狀態飄忽，喺歐聯贏咗柏辛域陀尼亞後竟然連輸兩場，而且佢哋後防唔多穩陣，近3仗均失2球，無力頂住曼城強大嘅火力，今仗恐怕凶多吉少。