甘馬雷斯穩陣派唔怕神經刀

猪拉多纳

西甲「神經刀」貝迪斯主場對葡超甘馬雷斯，貝迪斯今季喜歡「鋤強扶弱」，面對強隊往往有超水準發揮，但又會無厘頭輸畀魚腩球隊。今仗主Ｗ得1.36倍，貝迪斯明顯受高估，隨時倒灶，甘馬雷斯防守穩陣受讓得計，要2.8倍讓球客勝。

（有線63台周五凌晨1時直播）

貝迪斯喺西甲開鑼戰逼到皇馬幾乎失分，亦贏過華倫西亞及大勇嘅維拉利爾，但偏偏輸畀下游球隊切爾達及新升班嘅艾爾切。呢種特性喺歐霸盃都冇變，打和里昂，但贏唔到克羅地亞球隊列積卡。今仗遇上看似低一班嘅甘馬雷斯，都未必有着數。甘軍防守力強，難得有得參加歐洲賽，表現特別落力，可不敗而回。