尹佩斯「雲佬」邊個勁啲？

猪拉多纳

我睇波日子唔係太長，但都知道球場係英雄地，當中最易成為英雄嘅一定係前鋒，因為只有入球先可以帶領球隊勝利。當今英超最佳前鋒之一肯定係尹佩斯，上季佢為曼聯踢40場入30球，而最近佢仲喺國際賽大演帽子戲法，以破紀錄嘅41球，成為荷蘭國家隊入波最多嘅人。依家有人開始會將尹佩斯同昔日同樣係荷蘭兼曼聯前鋒嘅「雲佬」雲尼斯達萊相比，明晚《球分》會同大家探究一下。

（now 101周五晚10時30直播）
寸王返車仔帶生費托

講起前鋒，就點都要講吓車路士，車路士係英超近年有名嘅前鋒墳墓，除咗「捕捉」唔到杜奧巴之外，冇邊幾個前鋒有好表現，好似舒夫真高同費蘭度托利斯，一効力車路士後就好似連波都唔識入。不過，好在今季「寸王」莫連奴回歸後，費托終於有番啲表現，啱啱喺歐聯更梅開二度，就連老將伊度奧都喺聯賽開埋齋。如果佢哋今季前鋒個個都生生性性，要重登聯賽冠軍寶座絕對唔係冇可能。
曼城冇咗巴神始終差啲

車仔今個星期嘅對手曼城每季都有重量級前鋒加盟，就係因為佢哋好明白前鋒嘅重要性。曼城當年就係靠巴洛迪利、迪斯高、阿古路和泰維斯四位前鋒輪流發功，最後壓倒曼聯贏得聯賽冠軍，但上季巴神離隊後，球隊鋒線就好似冇咗嗰份意想不到嘅爆發性，今季加盟嘅尼格度當然有級數，但我始終覺得巴神比較好，阿古路同迪斯高喺巴神走咗之後，亦都冇咁Sharp，而佢哋亦明顯未同尼格度擦出火花，直接影響咗曼城嘅攻擊力。今個星期日晚車路士對曼城 ，就睇吓邊位前鋒可以成為英雄帶領球隊勝出喇。

（now 621周一淩晨零時直播）