熱刺讓客萬「夫」莫敵

猪拉多纳

猛火喪攻力爭提早出線

今晚歐霸盃K組爆發「榜首大戰」，英超代表熱刺喺今仗作客擊敗摩爾多瓦球隊舒列夫嘅話，就有望提早取得32強資格，當然會強陣出擊力求盡快出線！加上教頭保亞斯又相當識做咁幫猛將安祖斯唐辛減壓，相信呢位小將今場會有更好嘅發揮，一於捧1.82倍「讓客」！

（有線61、201及廣東體育周五凌晨1:00直播）

熱刺今仗一旦全取3分，而同組嘅特林素同安治又和波嘅話，就可以提前3輪取得出線資格，同時熱刺下仗英超只係主場鬥近況麻麻嘅侯城，今場唔使特別留力相信會派主力出擊，當中大紅人安祖斯唐辛大有機會正選出戰！只得22歲嘅佢近期無論喺國際賽定球會表現都非常好，更被譽為「加里夫巴利接班人」，成為傳媒追訪對象！不過領隊保亞斯非常擔心佢隨時壓力爆煲，就出言為唐辛減壓：「唐辛仍然需要進步，佢將會面對各種壓力，但要堅持踢好波。」有保亞斯射住，呢位小將要有更出色嘅發揮相信唔係難事！
舒列夫防線不穩輸質素

就算保帥好似上輪歐霸盃咁收起部分主力，但無論由蘇爾達杜、迪科爾、查迪尼、艾朗連儂、安祖斯唐辛邊個孭飛，條攻擊線仍然相當有睇頭，其中迪科爾近3場喺盃賽上陣都有進帳，3戰仲合共省咗5粒，殺手蘇爾達杜開季至今一直保持上佳狀態，加上新援查迪尼亦都連續兩場盃賽有進帳，今場波可以隨時候命，火力咁猛要省番舒列夫幾粒實在唔難。

主隊舒列夫喺摩爾多瓦聯賽戰績唔曳，但係佢哋連續6場不失球嘅走勢早排告終，近3場更罕有咁失咗兩粒，反映防線唔多穩陣，加埋後防主力米利停賽，球員本身質素明顯又唔及對手，今戰對住熱刺睇怕好難有運行喇！
Data King熱刺盃賽全勝零失球

熱刺今季所有盃賽錄得全勝及零失球，每場至少攻入兩球。

熱刺近3場盃賽都由迪科爾取得首名入球。

舒列夫近兩戰上半場都出現兩個士哥。