此起彼落冇懸念 費倫弗爆炸基

猪拉多纳

今晚意甲直播場次好睇唔好玩，Ali寧將注意力放喺基爾禾主場對費倫天拿，主隊態沉殘陣攻力疲弱，難敵起飛中嘅爭霸分子費倫天拿，1.88倍客Ｗ可視出擊重心。

（周日晚10時開賽）

基爾禾今季人腳實力無疑比上季弱，註定要為護級艱苦作戰，近況亦相當曳，近7場賽事輸咗6場，上輪護級大戰不敵熱拿亞，場上完全欠缺創造力，表現令人失望，球隊8場聯賽至入得6球，係意甲攻力最弱球隊，今仗陣容仲嚴重不整，主力守將丹尼利、阿歷辛度班拿甸尼、中場薛斯圖同阿哥斯迪都因傷缺陣，守將沙度同中場列干尼雙雙停賽，整體戰鬥力進一步削弱。
大衞比沙路傷愈復出

費倫天拿無論實力同狀態都遠勝主隊，近5場正式賽事保持不敗，上周中歐霸盃以半力出擊，都大炒羅馬尼亞球隊彭杜歷3球，上周日意甲對班霸祖雲達斯，於大部分時間兩球落後下末段連轟4球清脆反勝，呢場神奇逆轉對全隊士氣幫助極大。

費倫今仗有中場岩布仙尼、攻擊手伊利錫同箭頭馬里奧高美斯因傷缺陣，不過佢哋都已經養傷咗一段時間，對球隊影響甚微，翼鋒祖亞昆、古達度同射手基奧斯比羅斯狀態正處於巔峰，今仗賽前再傳來好消息，中場指揮官大衞比沙路傷愈可復任正選，今晚強勢撲擊基爾禾，Ali認為贏面高唱入雲。