曼城瓣數多 鍊車無有怕

猪拉多纳

高矮孖寶爆得又頂得

英超今晚上演「超級富豪打吡」，兩支喺過去10年使錢買人最多嘅英超勁旅車路士同曼城，會喺史丹福橋球場合演激戰。雖則話車仔有「主場王」莫連奴領軍，似乎秤高一線，但面對住進攻多變嘅曼城，要抵擋「藍月亮高矮孖寶」阿古路同尼格度絕對唔易，隨時前面入埋唔夠輸，車仔讓平半，力奇捧1.88倍下盤！

（now621台周一凌晨0:00直播）
英超雙富豪使錢歐洲列三甲

根據英國《每日鏡報》統計，原來自03年起至今，車仔足足使咗7.67億鎊去買人，扣除賣人收益後嘅淨支出多達5.85億鎊，出手豪氣冠絕全歐洲。緊隨其後係西甲嘅皇馬，淨買人支出都有5.18億鎊，排第3則係花咗5.04億鎊嘅曼城，如果齋計英超，車仔同曼城正係最肯使錢嘅兩隊。

兩軍陣容同樣星光熠熠，兼有個頂級名帥，車仔主帥莫連奴有幾猛料唔使多講，原來佢喺英超領軍64場主場戰未輸過，錄得50勝14和佳績。不過未輸過唔代表贏梗，何況紀錄都係等人打破，講到底佢哋今仗對手係來勢洶洶嘅曼城，真係甩拖又有乜出奇？講真，車仔今季喺歐聯都試過主場輸畀巴素利啦，就算話今晚佢哋有正選左閘A高復出，但小心佢狀態不足，隨時成為後防漏洞。
阿古路腳風順 尼格度頭槌勁

曼城隊長高柏尼繼續養傷，都仲有拿斯達錫同查維加西亞頂住，防線實力唔算太曳。更重要係呢班波根本係以攻為守，佢哋貴為今季英超首支取得20個士哥球隊，火力絕對有保證。事實上，阿根廷射手阿古路近3場轟入5球，腳風超順，無論打反擊定禁區混戰，佢都有本事入波。至於西班牙新兵尼格度係頭槌高手，曼城今季喺英超入咗5球頭槌全英最多，佢就獨佔2球，事實上尼格度喺2013年已經用「鐵頭功」轟入7粒，歐洲5大聯賽裏面，只得傑斯寧（12球）勁得過佢，今晚只要泰利同大衞雷斯一唔留神，隨時又畀佢搵到食呀！
Data King 曼城近5次交手4勝1和

‧車路士今季未有聯賽失多過1球。

‧曼城為今季首支英超取得20個入球球隊。

‧曼城近5次正式比賽對車路士取得4勝1和。
乜都玩錦囊 阿古路反擊快博開首球

曼城近5次對賽未輸過畀車仔，今晚作客史丹福橋一樣未驚過，特別係佢哋由速度飛快嘅阿古路打反擊，極有機會先拔頭籌，曼城嘅2.11倍「第一隊入球」同4倍阿古路「首名入球」都有得諗o架！